उर्दू शाळांच्या शैक्षणिक प्रश्नांसाठी अखिल भारतीय उर्दु शिक्षक संघाची महापालिकेत भेट

उर्दू शाळांच्या शैक्षणिक प्रश्नांसाठी अखिल भारतीय उर्दु शिक्षक संघाची महापालिकेत भेट

पिंपरी चिंचवड महानगरपालिकेत उर्दू माध्यम उच्च माध्यमिक विद्यालय सुरू करण्यात यावे: अशफाक शेख

अखिल भारतीय उर्दु शिक्षक संघ, पुणे जिल्हा (१११३८) तर्फे पिंपरी चिंचवड महानगरपालिका शिक्षण विभागात विविध शैक्षणिक विषयांबाबत भेट देण्यात आली. यावेळी उपआयुक्त श्रीम. ममता शिंदे व शिक्षणाधिकारी श्रीम. संगीता बांगर यांची भेट घेऊन उर्दू माध्यम प्राथमिक शाळांशी संबंधित विविध शैक्षणिक मुद्दे मांडण्यात आले.

संघटनेच्या वतीने पवित्र रमजान महिन्यात उपवासाच्या पार्श्वभूमीवर उर्दू माध्यम शाळांना एक तास शालेय वेळेत सवलत देण्याची मागणी करण्यात आली. तसेच प्राथमिक शाळांतील मानधन शिक्षकांचे मानधन वेळेवर अदा करण्यात यावे, अशीही मागणी करण्यात आली. याशिवाय शासन निर्णयानुसार २०२५ च्या शिक्षक भरती प्रक्रियेसाठी बिंदू नामावली तपासणी करून रिक्त पदांची माहिती पवित्र पोर्टलवर अपलोड करण्यात यावी, असेही निवेदन देण्यात आले.

त्यानंतर संघटनेच्या वतीने पिंपरी चिंचवड महानगरपालिकेचे महापौर रवी भाऊ लांडगे यांची भेट घेऊन उर्दू उच्च माध्यमिक विद्यालय सुरू करण्याबाबत पत्र देण्यात आले. यावेळी संघटनेचे अध्यक्ष अशफाक अफसर शेख यांनी महापौरांना पुस्तक भेट देऊन त्यांचा सन्मान केला. तसेच पिंपरी चिंचवड महानगरपालिकेत उर्दू कनिष्ठ महाविद्यालय (ज्युनिअर कॉलेज) सुरू करण्याची मागणीही करण्यात आली.

दरम्यान, संघटनेच्या वतीने महानगरपालिकेचे विरोधी पक्षनेते भाऊसाहेब भोईर यांची भेट घेऊन त्यांना गुच्छ देऊन शुभेच्छा देत सन्मानित करण्यात आले. तसेच नगरसेवक संजय नाना काटे यांची शहर सुधारणा समितीच्या सभापतीपदी निवड झाल्याबद्दल त्यांचीही भेट घेऊन गुच्छ देत अभिनंदन करण्यात आले.

या प्रसंगी अखिल भारतीय उर्दु शिक्षक संघ, पुणे जिल्ह्याचे अध्यक्ष अशफाक अफसर शेख, सहसचिव मो. आतिफ फैसल, जिल्हा कार्याध्यक्ष खुंदमिर जिनेरी सर, फसीहुद्दीन सर व आकिब शेख सर उपस्थित होते.