आगामी डीपी प्लॅनमध्ये मुस्लिम दफनभूमीसाठी २ एकर जागा आरक्षित करण्याची मागणी

आगामी डीपी प्लॅनमध्ये मुस्लिम दफनभूमीसाठी २ एकर जागा आरक्षित करण्याची मागणी 

स्वीकृत नगरसेविका शबाना मणेर यांच्या नेतृत्वाखाली देहू नगरपंचायतीला निवेदन.

देहू नगरपंचायतीच्या आगामी विकास आराखड्यात (डीपी प्लॅन) मुस्लिम समाजासाठी स्वतंत्र दफनभूमीकरिता दोन एकर जागा आरक्षित करण्यात यावी, अशी मागणी करण्यात आली आहे. याबाबत स्वीकृत नगरसेविका शबाना मणेर यांच्या नेतृत्वाखाली देहू नगरपंचायतीचे मुख्याधिकारी चेतन कोंडे यांना निवेदन देण्यात आले.

देहू शहराचा वाढता विस्तार आणि लोकसंख्येच्या वाढत्या गरजा लक्षात घेता मुस्लिम समाजासाठी स्वतंत्र व पुरेशी दफनभूमी उपलब्ध असणे आवश्यक आहे. आगामी विकास आराखड्यात यासाठी किमान दोन एकर जागेची तरतूद करावी, अशी मागणी निवेदनाद्वारे करण्यात आली.

दफनभूमीसाठी जागा आरक्षित झाल्यास मुस्लिम समाजाच्या नागरिकांना अंत्यविधीसाठी भेडसावणाऱ्या अडचणी दूर होण्यास मदत होईल. त्यामुळे आगामी डीपी प्लॅनमध्ये या मागणीचा गांभीर्याने विचार करून दोन एकर जागा दफनभूमीसाठी आरक्षित करावी, अशी अपेक्षा निवेदनातून व्यक्त करण्यात आली.

या वेळी स्वीकृत नगरसेविका शबाना मणेर यांच्यासह मुस्लिम समाजातील नागरिक व पदाधिकारी उपस्थित होते. मुख्याधिकारी चेतन कोंडे यांनी निवेदन स्वीकारून मागणीबाबत नियमानुसार कार्यवाही करण्याचे आश्वासन दिले.